مرثية السباعي..(100بيت)الشاعر/محمد صالح المصعبي

بإسمك إله الكون مطلع رثائي

ياباسط الأرضين تحت السمائي

بأمرك إلهي تفعل اللي تشائي

والخلق للأقدار ماهم يردون

الشكر لك يالله وبالنعمه نبوء

والحمد لك ياالله على كلّ سوء

واستغفرك ماوخّر الديجور ضوء

يوم الكواكب في فلكها يدورون

ياالله يامنزل( تبارك) و(النبأ)

و(الكهف) و(الكوثر) و(ياسين) و(سبأ)

يامنشي البرزخ ويامنشي اللبأ

عبدك توسل (بالزمر) و(الكافرون)

يارب أنا عمّي عن العين غابا

ضحا الربوع الشين شد الركابا

في سته وعشرين مايو مصابا

واحسرتي والله على السمح الحنون

هو فزعة رجال القبيله في النشب

هو صاحب الصاحب وهو صوت الشبب

هو راعي الهوجاء ومعصور الشنب

قدره مع الأخيار محفوظ ومصون

ماجاته الدنيا على ماهو يبا

لكن حياته كلها عز وإبا

والناس تشهد له من أيام الصبا

وافي شبر ماهو كما اللي ينقصون

فرقاه منها حالتي حال منهوب

غزوه قوم الشرّ وألفوه مسلوب

شلّو البكار السود ياعمّ مغصوب

مطعون بإيدات الذي مايخافون

(عمّاه)أنا مطعون بأربع جنابي

أربع قديميّات فيهن عذابي

حكم الزمن (ياعم) ضيّع صوابي

ساعة نظرتك داخل القبر مدفون

(عمّاه)أبكتب لكن جيوش الآهات

في روح مخنوقه على غاليِ ِ مات

والحبر فوق الطرس ممزوج دمعات

وشلون بكتب فيك وشلون وشلون

حادي حداة الموت هل تعرف الموت؟

قله يجي بحدي له بحالي الصوت

بقول هاك الروح ياموت بسكوت

خذني إلى الأموات ياموت ممنون

بشوف من ياموت عندّه تربيت

عمِ ِ كريم ومعه مايوم زليت

وهو الذي من بعد فرقاه ونيت

ونة شجاعِ ِ طاح بالغدر مطعون

ياونتي ماونّها (عقاب)في (نوت)

وياونتي ماونّها (صاحب الحوت)

وماجابها راعي من القهر مكبوت

من ظلم (شماخ العواجي)(لسعدون)

لو جبت ماجابت على(عقاب)(نوته)

واللي على (هذلول)(هيفاء)بموته

واللي (تماضر)في (صخر)يوم فوته

ماهو يكفّيني على الغالي حزون

بشوف أنا الغالي وبشكي له الجعث

بقول شف وشلون حالي غدى رث

خذني معك (ياعم)إلى ساعة البعث

وببعث أنا وياك في يوم يدعون

(عمّاه)فيني الهم والضيق عاثا

عوث الحروب المانعات الإغاثا

أشوف خلق الله جميعا خباثا

يبدون عكس اللي حقيقه يكنون

أعوذ بالرحمن من كل نفاث

وأعوذ بالرحمن من كل الأضغاث

وأعوذ بالرحمن من كل عباث

والظاهر إن فيني وساويس وظنون

معذور عقلي لو يجيه إرتجاجا

مادام قلبي طار وسط العجاجا

وأكلي وشربي صار كلّه هجاجا

إي والله ان العقل ممحون ممحون

(ياعم)وش حالك عسى الحال مبهوج

في عالم الأموات ماانته بمزعوج

عسى من الفردوس يأتيكم الفوج

يحمل روايح جنة الله تشمون

(ياعم)وش حالك عسى القبر فجه

مد النظر واسع ولا فيه ضجه

ترتاح به من كل حاجه وحجه

لا يوم بأمر الله منّه تقومون

الأعيان سهرانه من الحزن للصبح

تذرف لك الدمعات والموق به جرح

والقلب قد هو ذاك ماهو بمصطح

نبضة من الأوجاع ماهوب مازون

متذكرِ ِ وقت معك يالغلا راح

كل السوالف كلها كل الأفراح

أيامنا الزينات وأيام الأتراح

من عاد أنا طفلِ ِ صغيرِ ِ صغيرون

ياللي مع العربان ضاحك ومزاح

وتضّحك الزعلان وينام مرتاح

كأن لقلوب البشر معك مفتاح

تدخل خوافقهم وهم بك يهلون

مملوحه أطباعك ومملوح روحي

سمحة مباديّك وقلبك سموحي

صفحة حياتك تنقرا بالوضوحي

ماشفت فيها أي شي به يشّكون

حكيم رأي وتقنع شيوخ وشيوخ

لا قيل ويش الرأي والصفّ مشروخ

رأيك يجي مطنوخ من راس مطنوخ

ويارب ليل أعداك باتوا يصيحون

في لازم أصحابك يمينك سخيّه

مداتها مدات خيِ ِ ل خيّه

حتى ولو وقتك حباله رخيّه

شديتها من شان ربعك يشدون

يااللي تقود العيس فوق الشوامخ

متحمله الأحمال والليل دامخ

تطرب معاك العيس والبرد صامخ

ماهمّها برد الليالي وش يكون

الله من وقتن قضا ليته يعود

وقتن قضا وياك زودِ ِ على زود

في ديرة آل سعود عشناه بسعود

شمال من حايل ومن الأردني دون

أيام (ياعمّي) توديني الصيد

وأنا صغير اتقودني معك بالإيد

رايح معك طفلِ ِ ولا أدري وش نريد

همي فقط إني معك لازم أكون

وإن لاحت الصيدة وفزّت شارده

وانته تعزوى وابتديت مطارده

إيدك تجر السكن وعين اتشاهده

لاهو يغيب الصيد ياللي تصيدون

ماهمّك الموتر لو إنك تكده

همّك تنال الصيد وعنقة تقده

وتشب ضوّك والعشاء لي تعده

وتجلس تلقمّني من اللحم بفنون

ومتذكرِ ِ ليله بها الصيد مفقود

ومعنا الطحين وتعسمه ياسنا الجود

وقمت أجمّع لي من ترابها كود

وأعسم تراب القاع أبا الرمل معجون

وانته تنادي(ويش عندك ياولد)

وأقول:أنا أسوّي عشاء والليل برد

تضحك علّي ثم تعتزي(أبوالولد)

وتخص للعربان قصدك يضحكون

حسبي على الموت الذي هو لك خذا

لوهو نشدني قلت له خذ ذا وذا

خذ لك ميّة رجال مشروطه بذا

حاضر بحاضر كلّهم ماشي ديون

هبيل ياموتِ تبا القلب فولاذ

دايم تجي مسرع وللزين آخاذ

ماتوخذ إلا أحرار وأبطال وأفذاذ

وتترك بدلهم ناس ماهمّ يكفون

منا خذيت الذيب والنمر والصقر

في ظرف عشر سنين شليتهم قهر

غالب وأبوحاشد وأبوفهد يافقر

يوم الثلاثه بالتتابع يموتون

وين أنت ياذا الموت وين أنت مرار

وين أنت أبا أشوفك وعندي لك أخبار

والله لولا السالفه حكم وأقدار

إن أذبحك ياموت وتموت مغبون

ياوجد حالي وجد ياشين ذكره

وجدِ كما (قيراط)في شين عمره

ولا كما(راكان)في يوم أسره

في ديرة الأتراك منسي ومسجون

أبكي على رجّال ماشفت جيزة

إلا الرجال اللي عزيزة عزيزة

قضيت أنا وياه فتره وجيزة

عقدين وخمس سنين ماهم يسدون

شمال من حايل وفأرض الحجازي

وأيام في نجران مثل الجوازي

ومأرب مع شبوة وديرة حرازي

وأبوظبي وأرض الحساء مايهونون

إي والله ‘إن أبكي ولانيب جايز

دام البكا في موت الأجواد جايز

جايز أموت من البكا شي جايز

وإن مت لاتبكون ياالربع تكفون

يكفي عليكم روحة الحر قرناس

مانا بمثله كودني بس شرياس

وإن مت ودوني مقابر بني ياس

هناك أنا برتاح برتاح بالهون

بشوف أنا الغالي وباحبّ راسه

وباضمّه بصدرِ ِ تفجّر حماسه

وبحكي له إن العمر بعده نحاسه

ماعاد له طعمِ ِ ولا عاد له لون

وإن قال:(كيف الناس)باقول:جلسه

عطني علومك أنت والناس جلسه

سولف معي يازينها اليوم جلسه

وانته تسولف لي والأموات يوحون

ياالله يامن بأمرك الخلق تعتاش

يارب عرشِ ِ معتلي فوق الأعراش

إنك تسوق المزن شهرين رشاش

على قبور وناسها لي يمونون

وارحم عزيزِ ِ صارت القاع فرشه

تالي العهد به يوم نمشي بنعشه

يارب من عندك نبا الذنب محشه

بحق جاه الأنبياء والمرسلون

عساه في الجنه له الورد مفروش

ويلبس من السندس وبالطيب مرشوش

جالس على زين الأرايك ومنعوش

وعنده بنات الحور يمسن يغنون

ويقدع في الجنه تمور الخلاصي

أحلى من اللي في الحساء والنماصي

موضوعةِ له في وعاء له لماصي

يأتوا بها غلمان بالهمس ياتون

وخلّو له الرسلان والهيل مرتص

عنده وهو في صنعة البن مختص

يامن حمست البن له حمّسه نص

واجلس تفرّج فالبدو وش يسوون

يأتيك فنجاله ولونه خصوصي

والهيل ريحة ينطحك لا تحوصي

أشقر يقنّد راس كله شصوصي

ولازم يقهوي كلّ من به يمرّون

هو خابرِ ِ بن اليمن كان فأرضه

قولوا له إن بن اليمن ذاك فأرضه

لكنّ ذاالجنّه بها بن برضه

أخير من بن اليمن ذي تحبون

ويالله بدل درّ البكار العواضي

اللي تمنّحها معانا يعاضي

حليب خلفه مارعت في الأراضي

مرباعها الجنه وماهو تشاء يكون

ترعا بأمان الله وتارد على الحوض

تشرب من أعذب زمهرير وثم تفوض

تقبل تهزّع له تقل شايفه روض

وإن جات عطّفها ملى الدرّ ماعون

ويشرب وهو مرتاح ماشي له يجض

بعد المرض ذي كان ماعاد يمرض

عن كلّ ما قالوا الأطباء يعوض

وانته كريم وتعطي اللي يريدون

نهر اللبن قدام مركاه ينحط

ونهر العسل صافي ولاقد تخلط

والخمر نهره جنبهن حيل مفرط

وحوض النبي لاجاه قالوا له تمون

عساه في الفردوس مركاه محطوط

عند ابن عبدالمطلب حيل مبسوط

في مجلسِِ ِزاخر بالأصحاب محووط

اللي لهم تاريخ بالعز مقرون

يالله تهب له قصر قاعه بلاطي

مبني بفضة مع ذهب بإختلاطي

وعرشك يكون السقف ياخير عاطي

سبحانك الله عدما هم يلبون

و(يابوعلي) لك ود في القلب محفوظ

وفي قلب منهو يعرفك ود محفوظ

و(يابو علي )في ذمة الله محفوظ

اللي حفظ في اليمّ (موسى) ل(فرعون)

(ياابوعلي)روحي بموتك وجيعه

(يابوفهد)سبّة وجعها الفجيعه

(ياابومحمد)باقي العمر أبيعه

ببيع باقي العمر لو كان يشرون

وين أنت يامخلوق للروح نزاع

تعال عندي روح مليانه أوجاع

ماشوف داعي للبقاء والتجعجاع

لاصار عيش الآدمي كله شجون

ياعين هلّي بعد موت السباعي

هلّي على منهو هزبر السباعي

بعده ترى ياعين ماشي سباعي

يبطن بنات اليوم مثله يجيبون

ياعين ياللي صار شوفش فراغي

راح الذي للخصم عنده رصاغي

منهو هدر خلاّه يمسي يراغي

هان الفحل في شوف منهم يهابون

أنشهد إن العقل ذاالليل زايغ

والفكر عشر أيام رايغ ورايغ

هارب عن الواقع وفالوهم صايغ

من شاف حالي قال لاحول مجنون

أنشهد إن الوقت ماهو بي ايروف

صكات وقتي واجده لكن اطوف

لكنّ ذاالمرّه رماني ب شاخوف

كنّي الغريم اللي مطّلع له قرون

إي والله إن الشعر ماعاد له شف

على الورق (ياعم)حبر القم جف

والهاجس البداع أنا قلت له أف

إذلف ودوّر لك مع غيري لحون

متذكرِ أيام ِ معك نبدع القاف

في مجلسك (ياعم)والشعر ميلاف

تنظم قصايد كنها الشمس تنشاف

أحلا الشعر (ياعم)مرسوم بفنون

إي والله إن شعرك مثل شامخ طويق

وإن جبت أنا شعري معك كوده بليق

ماهو يساوي شي من دون تعليق

الفرق واضح عند منهم يشوفون

زمان أنا وياك والشعر أصاديق

تبدع حروفك لي وأجرّ الطواريق

مااليوم فيني الحزن جزّ المعاليق

جزّ المناشير الشجر دون قانون

مالي جدى ياكود أناجيك ياحق

يوم المصيبه حرّقت مهجتي حرق

والعين ماها وابله ينزرق زرق

إنك تهونها وأنا أقول ممنون

يالله فيني الهم والحزن مشبوك

مع الكدر والضيق والقلب مضنوك

على الذي بابه للأجواد مفكوك

شهمِ ِ كريم ِ عنده الناس يلفون

ياالله في راسي أحس إشتباكا

مثل الحروب الطاحنه والعراكا

وإن قلت له ياراس ماذا دهاكا

كن حد يجاوبني علاما تسألون

أقول أنا وش داخل الراس يحتك

كنه مفاعل داخل الراس وأفتك

مات الفكر منّه بالأعضاء يفتك

منّه عروق الراس باتن يونون

وإن كان هذا موت ياالله تقوله

مرحب تراحيب المطر في وصوله

حط الجمل من فوق ظهره حموله

والموت نعمه كان يالربع تدرون

قد قاله الله كل ماكان زايل

ماشي على بقعاء وللخلد نايل

لازم يجي منهو للأرواح شايل

اللي خذا رمسيس الأعظم وهارون

بشوف أنا منهو حدا بالرحيلي

اللي رحيله عننا هدّ حيلي

نعم القبيلي ذاك نعم القبيلي

أنشهد إن مثله لهمّي يجلّون

أنا أشهد إنه في المواقف بطلها

لاصارت الدعوى كبيرِ ِ ثقلها

فزّ وتعزوى لين عقّل فحلها

عادات منهم للمراجل يهمّون

مع طيور السابعه ذا السلاما

مرسول للي داخل القبر ناما

يفوح عطره ريح فلّ وخزاما

لا قام مرّنه وللورد يرمون

وإن قال:(وش هذا)فقولن:سلامي

ياالهيلعي العنتيت كل إحترامي

بالله كيف الحال؟ويش العلامي؟

خبّر طيور السابعه لي يردون

(عمّاه)طيفك مايجيني بالأحلام!

تدري لماذا؟لأنني صرت ماأنام

أسهر وحيد أتذكّر أيام وأيام

وأيامنا الحلوة لها القلب مشحون

ياكثر ماجيتك وأنا صدق مهموم

وانته معي في محنتي دايم تقوم

إي والله إنك راعي سلوم وسلوم

ياكثر ماتعطي وغيرك يشحون

إي والله إن تعوي عليك السراحين

يمسي عواها ساريٍ ٍ له تلاحين

من عين من بيحان وساق المصعبين

اللي لها تاريخ للي يقدمون

يحن (قرن عبيد)ويبكي لك (أفقان)

ويحن لك(ريدان)ويبكي(غرابان)

(والقايمه)حنّت و(مرقد)و(جربان)

(وذهبا)مع(أشعاب النسيين)يبكون

(شقير)مستوجع(ولقرح)لك يون

(والشق)مستوجع و(تمره)لك تئن

حتى (الفليحه)و(الكحيله)لك تحن

و(بليق)هو و(عروق مغزر )يحنون

ويحن (بن سبعان)و(ذراع غزلان)

و(لبغث)مع(صوفه)مع(حزم لحمان)

و(المقصره)تبكي ويبكي(عشرقان)

ياللي معاك المصعبه دونها الدون

أنا أشهد إن فراق الأجواد مكروه

وأنا أشهد إن فراق الأنذال حبوه

وانته فراقك قالت الناس مكروه

تنعدّ في الأجواد ساعة يعدون

إي والله إن القلب لك جرّ بالآه

وينوح مستوجع من أقصاه لأقصاه

مثل (المهلهل) بعدما فارق أخاه

أو مثل (عنتر) يوم يبكيه ( شيبون)

ياالله ياربِ له الناس تدعيه

أسألك تغفر له ذنوبه وتمحيه

وتثبته لاجاه منكر مع أخيه

ويقول أنا من قوم لله يسجدون

نبيّنا من فاضت بوصله سماوه

نبيّنا من جيّته غاصت بــ ساوه

منهو رجس إيوان كسرى وضاوه

والعيس جرّت خيل للي ينامون

نبيّنا من كان ختم النبوّه

آخر نبي مبعوث للناس عنوه

ماعاد حد بعد النبي له نبوه

واللي ادعاها (يلعنوه اللاعنون)

نبيّنا من سادت العُربْ صفوه

مذكور في الإنجيل ذكره بقوه

تعلم به أحبار اليهود وتأوه

وإسمه ( محمد)ياملايك تنشدون

والدين أنا لي دين مشهور بإسمه

دينِ ِ من الله للبشر عمّ حكمه

دينِ ِ وفيه النور من كل عتمه

ورسالته قرآن واضح ومفطون

ديني هو الإسلام راس المعزّه

مقرّه الكعبه وفيها مرزّه

دينِ ِ أتى بالنور والشرك طزّه

حطّم هبل واللات عار المشركون

يالله أنا سهران لا طلعة الضاو

ماعاد حولي نوم والراس ذا خاو

أكتب بيوت الشعر بالنون والواو

عفوَا أروبعها على الواو والنون

أكتب ملاحم حزن والصدر به ضو

والطرس بدموع الحزن صار يزهو

ساح الحبر فوقه وغطّا لي اللو

قريتها عكس الذي الناس يقرون

لاجيت أبكتب لو صارت كما أو

وإن جيت أبكتب نون صارت كما نو

وإن جيت بكتب إيه صارت كما إو

وأقول أنا ماأويّت والناس يووّن

يالله أريد أختم وقلبي معيي

يقول زيد القاف يابعد حيي

وأقول أنا يكفي كذا ياوخيي

ثم قال أنا المحزون وفاضت له عيون

ياويل حالي صار ذا القلب يرثي

وأنا الذي قاعد وللغالي أرثي

وأنا فقير إن مات ماخلّف إرثي

غير القصايد في الدفاتر يعيشون

يالله ترحم كل منهو توّفي

اللي قضا عمره بشبره موّفي

والناس قالو:من تجمّل يوّفي

وأبوعلي واحد من اللي يوّفون

يارب أنا أترجاك ياسامع دعاي

تغفر خطيّاته وتغفر خطاياي

لاصار يوم الحشر جيناك حفّاي

وأعمالنا يارب ماهن يساوون

يارب أنا أسالك وتعرف نواياي

تعرف جميع اللي خفا من خفاياي

ياسامع الدعوه وعالم بنجواي

وأعمالنا يارب أبد ما ينفعون

رحمتك تنفع كل مسلم تقي

ورحمتك تنفع كل عاصي شقي

من نارك الحمراء بوجهك نتقي

عبدك توّسل (بالزمر)و(الكافرون)

</strong>

رحمةالله عليك ياالسباعي
وصح لسانك يااخي محمدصالح المصبي
وسلمت يدك اخي بليق على المرثيه

تسلم ياقناص آل فجم
تم اضافتها كاملة

الله يرحمه ويغمد روحه جنة الفردوس - آميـــــن
صح لسانك بليق ...

صح لسانك ويرحم الله عمك وعظم الله اجرك

ابيات من يقراها يشعر بها شعور حقيقي والسبب انها طالعه من صميم القلب

الله يرحم جميع موتى المسلمين وبيض الله وجهك ماقصرت

تسلم ياظبياني وصح بدنك

وأجرك عظيم إن شاء الله

وشكرا ياالغالي على الرد الطيب منك لا هنت

تحياتي

تسلم يمناك يا محمد صالح

الله يرحم عمك ويسكنه الجنه في الفردوس الاعلى

شكر ا أسير الصمت لاهنت

رحمك الله يا بوعلي واسكنك فسيح جناته

قصيده حزينه .. اقراها و اتذكرصورة المرحوم وسوالفه اللي ما تنمل

من عرف ذلك الرجل الطيب لابد وان يحزن عليه

نسأل الله له الرحمه والمغفره

صح لســان الشــاعــر

سلمت اخي بليق ع طرح المرثيه


احترامي وتقديري