ساعي الشر....محمد صالح المصعبي

ياصاحبي قم معي ناقف على الأطلال=ونشوف وين الذي قايم ووين الميل
البارح أعلامها عاجل على الجوال=والمتصل بي شرحها كيف بالتفصيل
وأمسيت أحلل مخارجها مع المدخال=لاما انكشف لي خفي الأمر بالتحليل
بان الصديق الصدوق وبان لي المحتال=اللي سعى لأجل شق الصف بالتضليل
اللي صَدقنا له البيضاء بروس جبال=واللي كذبنا له السوداء نهار وليل
هو مادرى ان الهروج الكذب للأنذال=وإنها تسّجل عليه ومالها تبديل
لوهو كذب بالغلط والهرج قيل وقال=يمكن دمحنا له الزله مع التعديل
لكن سعى بالفتن مسرع يبا الاشعال=قصده يورّط عباد الله معاه تكيل
وأنا قرعته وفي يسراه سيت عقال=غير انطلق من عقاله واندهف فالسيل
والسيل شله ولا قصّر معه فالحال=ساقه معه حيثما نحّى معاه يميل
لاما رمى به مكسّر فوق ذاك الجال=ماعاد يقدر يقوم يسير لأجل يشيل
لو قرّ معقول بكره بايشّل أحمال=وحاله مثل حال باقي العيس فالتحميل
لو طعتني كان قدرك فالعلا لا زال=وماكان شي لوم بك لاحق ولا تنكيل
والحمد لله ساعي الشر كيف ينال=جزاك نلته مدّبل جاك فالتحصيل
باير ولا عاد لك شي هرج بين رجال=لو تعتذر مايفيد العذر والتعليل
تشوّه إسمك وإسم جدّك معك ينقال=وجدّك على العز مايرحم ظهور الخيل
لو جدّك يعل كيف أتبدلت الأحوال=وتاريخ جيله تشوّه والسبب ذا الجيل
يقوم من لحده المدفون تحت رمال=ويسيك فاللحد وفوقك بالتراب يهيل
شف ياقليل الجهد أهلك رجال أفعال=وتاريخهم لا اظلمت ينشاف شوف سهيل
في لحيتي ماتبعت أهلك ولا الأخوال=الماء وقع في ثمامه وانت جيت ثعيل
وأنا أحسبك ذيب في وجه العدا قتال=وأثرك ثعيلان تقوْح ثم تجر الذيل
جهدك على أمك ولا تقدر على الأبطال=وأنا أحمده بان خبرك لي بدون حْميل
وعاد المراحل طويله تتعب الجمّال=وماتنقطع غير للي هو يشد الحيل
لا جاء وعرها قطرها ثم عبر الاهوال=لذكره وعزّه يكود العيس كود الويل
وأنا أحمد الله في طبعي وسيع البال=وأبشرك حالتي زينه وأنام الليل
يوم أنت حانب تفكر طال ليلك طال=بأسباب هرج الردى والزمر والتطبيل

تسلم والله ايدك على هذه الابيات بصراحه اعجبتني

رووووعه تسلم يمينك الغالي بيلق
وصح السان الشاعر قصيده مميزه وممتازه

صح لسانك ياابوصالح والله يقويك

ابيات روعه في مطلعها ومضمونها يتكلم عن النصح والطريق الامانه وكسب الصاحب ..

وعدم التفرقه في مابينهم ...

بيض الله وجه الناقل وصح الله لسان الشاعر الكبير .. محمد صالح المصعبي..

له التوفيق والتقدير...

مشكور على النقل المميز والكلمات الرائعة كلها حكم وامثال ولو بعد فيها شوي تهجم بس القافية موزونه مع اني ما اعرف شو القافية ههههههه .
تسلم يمينك .