ولي عيونً دمعها كل ماجف<>دلت طواريق الدهر وين ماها

ولي عيونً دمعـــها كل ماجفّ
دلت طواريق الدهــر وين مــاها

تدلي على محجر عيوني وتغرفّ
وتملا سوانيــها وتروي ظماها

تسقيك يا روضٍ من العام ناشفّ
ارضٍ سحاب الوسم عقبي جفاها

تنعى ربيعٍ فوق ريضانها ضفّ
وعشبٍ به النوار عانق سماها

جوٍ به الديمه تنادي وتهتفّ
جوٍ به الرعاد جفل قطاها

ارضٍ بها يمشي الحبيّب وياقفّ
الله يسقي جرةٍ له مشـــــــاها

يوم يتمشى للزبيدي ويقطفّ
الارض تضحك يوم يقطف كماها

وفز الزهر خجلان وده يسولفّ
واضن حتفه لاكشفتله غطاها

يالله عليك الحال تدري وتعرفّ
ارضٍ بها دجنا تجدد حياها

اليوم مالي وسط ريضانها شفّ
لكن احب اثني وابين سخاها

أرض جمعتنا فوق عشبٍ ترادف
يوم الليالي ماصفت من قساها

ويقطعك ياوقتٍ كما الرمش لارفّ
ولا ذلولٍ ماتداني عصاها

وهذي عيوني دمعها كل ماجف
دلت طواريق الدهر وين ماها
....