زهرة النردين....محمد صالح المصعبي

يافريد الغيد ما بالغيد حد غيرك فريد=ربك اللي ميّزك واعطاك حسنٍ يوسفي
قدرة الله الذي قدر على ماهو يريد=صوّرك وأعجز عقول الناس في وصفك تفي
في عيونك للملا صوّر بن الصمه دريد=من رآها عشرته لو جت ثلاثه يكتفي
كيف..لا .والرب ساقك فتنةٍ بين العبيد=لو رآك البحتري يعجز لسانه يوصفي
لو حضر مجنون ليلى قال أنا عمري نكيد=ماقدر يكتب قصيد ومات لك متأسفي
وإن أتى مسحل مع لافظ وصاحبهم هبيد=أشتكوا ..يامعشر الشعار ..مافيكم وفي
أدركونا أين الأعشى وامرؤالقيس وعبيد=من أخذ من عبقر الوادي جميل الأحرفي؟
مالقوا يازهرة النردين لأوصافك قصيد=تستحي كل القصايد مثل شمسٍ تكسفي
كيف أنا بأوصف حلا منهو غدا للغيد سيد=مشكلة لو هاجسي في واجبك ماشرفي!
يازبيدة من عرفتك كن لي عمرٍ جديد=أبتدت لي فرصته وأحلا زمانه لي صفي
يازبيدة ما خفا لك حب هارون الرشيد=أشهد إني فيك مغرم والصراحه موقفي
كلما ناظرت وجهك شفت أنا الفجر البعيد=وأنكشف لي من بياضك كل سرٍ مختفي
وكلما همسك وصلني يبتدي السحر الشديد=من يعالج سحر بابل ؟من يفكه وأشتفي؟
لو تقولي:من تكون؟أقول:أنا طرقي وحيد=مالقى في عالم التشتيت من له يعطفي
راحلٍ من عالم الشده إلى العيش الرغيد=وأنصدم من عالمٍ مافيه شخص يضيّفي!
كلما جاهم يدق الباب.. قالو:وش تريد؟=ناس ماترحم غريب ان كان له ماتعرفي
عكس ناسٍ..مجبره بالفقر والعيش الزهيد=يفرحون بضيفهم وقلوبهم به تحتفي
الفتى في عالم أهل المال في عيني بليد=والفتى في عالم أهل الفقر صقر مثقفي
والفقير بعين أهل المال شيطانٍ مريد=والغني بعيون أهل الفقر ذا متعجرفي
مشكلة فيها التناقض لكن الحل الأكيد=التواضع حل قد قاله رسولٍ مصطفي
يازبيدة جيتكم ماجيتكم ساعي بريد=وجيتكم ماجيتكم ضامي لماكم يرشفي
يازبيدة جيتكم وأحمل معي قلبٍ عنيد=كلما شاف العلالي قال:قم شرّفي
جيتكم وأحمل كتاب موقع بختم العميد=فيه أنا مظلوم وأرجو منك عدلٍ منصفي
الجريمه مرتكبها بي بن الصمه دريد=طالني سيفه وأنا سيفي رديّ منتفي
لو حصل إنصاف منكم عشت أنا هايم سعيد=وقلت أنا محظوظ في دوله وحاكمها وفي
وإن حصل لي غير ذلك قمت أهيجن بالنشيد=اهربي ياناقتي بي درهمي لا توقفي

صح لسانك ياابوصالح