الصاديه (100بيت)

يامنزل ٍ عم وطه والإخلاص= يامن على فرضك عبادك حريصه
أنت الملك وأمرك نلبيه بإخلاص=ونيع الأرواح العزيزه بخيصه
يامن رزقت الصوص فالعش لا صاص=لولاك ماحد يلحقه من وصيصه
يامن لك الشكوى معزّه ومخلاص= وشكوى لغيرك ياإلهي نقيصه
يالله طلبتك ياعليم بما حاص=في قلب من سجنه يريد الخليصه
أرفع لك أحواله وتقريره الخاص=وأرجو فراج المشكلات العويصه
اللي غدت للروح فالليل مقلاص=تمسي تفحمها فحام القليصه
والعين سهرانه وذا القلب منهاص=ماطاع يهدالي وضاقن فريصه
ضاقن من أيامٍ خسيسات ورخاص=فيها وليد أمه نجومه لميصه
في شرعها تعشق رديين الأشخاص=اللي يحبون الردى والرخيصه
وتعاند اللي للجمالات قناص= اللي لفعل الطيب نفسه ربيصه
اللي على جرّة الأجاويد قصاص=قابض بأثاريهم ولا شي يحيصه
تطلق عليه النار بسهوم ورصاص=ودرعه من الايام واجد لويصه
تعصر له العلقم وتسقيه بقلاص=ويغص في حلقه ويمغط غصيصه
صابر عليها صبر من فالبحر غاص=في بطن حوت وماياس من فليصه
يرجي فرج منجي نبيّه بإخصاص=يوم المره من خلف قدّت قميصه
يالله تفرجها بعد طول مخباص=مخباصها يالله كرهنا خبيصه
سرحانها يعوي ويلوي بالأقفاص= والحر الأشقر عقبوه القنيصه
والثعل من بعده بطل كل مرقاص=والبوم في عالي سمانا حويصه
ايام مايجلى غثاها بالأقراص=اللي من الدكتور معها بوليصه
حتى الحبوب اللي تهرّب على الشاص=مافاد منهو يشتريها مصيصه
دنياً تصيب الجيد فيها بالإنقاص=لاما يحس جلال عظمه شصيصه
تصيب عظمان السواعد بالأشصاص= والظهر من مبطي يعاني معيصه
يصير لا جات الثقيلات يعتاص=كنه بعيرٍ في مناخه فحيصه
لو يضربه راعيه بأمات الأخواص=والخيزران وكل شفه قحيصه
ماعاد يشتال الثقيلات بصباص=عذره معه دامه شكى بلغليصه
مدري بلى بقعاء على أولاد الأحفاص=ومدري لويش تحب أبا حنبصيصه
اللي فلا جات المهمات بلهاص=ماقد ثبت وأشتاف في ساع بيصه
واذا عدى ليله على فرقة أبواص=يكفيه طلي الشاه ذي حنفصيصه
ماهوب ذيبٍ ماله أيات بهاص=لاقد عدى خلى غنمها جنيصه
اللي نشبه به من القوم جرجاص=رجلٍ فعوله مابها من حكيصه
اللي غريمه من تحديه بلآص=مشراده أخرج من عناه وجصيصه
من الشجاعه حصته فوق الأحصاص=ومن المكارم حصته حصحصيصه
للضيف حط اللي سنامه به الآص=ماهو يعشي الضيف لا جاء أميصه
لو تكثر ضيوفه فلا حاص او باص=يفرح بجيتهم ويدعي أصيصه
طبعه كذا وان صاد في يوم الأحماص=من لحمها يرسل لجاره نقيصه
ماهوب لا حاسد ولاهوب دغاص=دمث الخلق ماهو بواحد شكيصه
لكن دنيانا عسى عقلها راص=ومصابها يالله طلبنا رميصه
ياالله تزينها بعد وقت شّصاص=تنبت مراعيها وننسى البهيصه
نرتاح مانعوز بها ساق عرقاص=وخيولنا ماعاد تشكي رهيصه
وياهاجسي ياللي معي مثل شنقاص=جب لي عن الريحان ذي فالأصيصه
اللي هويته والهوى ليس بإرهاص=لكن غصيبه والسبب من شخيصه
سحر العيون السود ويلاه علماص=سحر أرتعص فالقلب سبب دليصه
أنا اشهد انه غافص الروح وانداص=داخل حناياها وماأحلى رقيصه
والحب مايحتاج للناس دخراص=كتمت حبي له وكاتم بصيصه
ماغير اغني لي فلا جاني ارعاص=وبستانها فالقلب يكثر شبيصه
ياشيبة الديمن وياشيبة الهاص=بنت السبيت أتلبست حربصيصه
تكفون أنا راسي من الحب دلماص=خايف يجيني الموت ساعة غفيصه
واموت أنا مابعد لامست الإجاص=اللي بصدره روسها كالحفيصه
غلطان من قال الهوى دين غماص=ماجربه ماشاف منه البعيصه
ماهو بمثلي فالهوى صار غواص=غصت البحر ماغصت أنا دكنكيصه
أنا اشهد انه بحر للناس دعاص=مايرحم الغواص لحظة دويصه
غصته لعين اللي رماني بمشقاص=وأشحص جميع اللي بقلبي شحيصه
اللي جبينه في دجى الليل دملاص=وتاجه على المرجود يبرق خويصه
اللي خدوده متعبة كل دياص=من سحر منظرها وكثر الدفيصه
اللي شفايفها دوى كل الأخماص=من ريقها اللي فيه كل انخميصه
اللي تقوّس خصرها مثل معراص=لامن مشت يظهر شميصه مليصه
اللي سوالفها مثل حكي صعفاص=مافيه من حكي اليمامه عكيصه
اللي دقاقة ساقها مثل عرفاص=لكن سترهاثوبها بإتخريصه
اللي اذا تاطا بالأقدام الأدعاص=تترك رسوم آثارها دون غيصه
تولعت انا والقلب بأشواقها غاصّ=لكن ليالينا علينا عميصه
والزين مايطلع ويمشي بالأعراص=وصدري بلا شوفه كثيرٍ غنيصه
مدري علام الزين فالحب معياص=عيا يجي يجلس معي وسط عيصه
اثر الحلو نفسه تبا كل دلاص=شاف الدلامص قال جب دلمصيصه
أناأشهد أني بايت الليل محتاص=منين أجيب اللي عجبها لميصه
يوم الذهب غالي على أولاد الأخصاص=اللي مخابيهم هزيله خميصه
اللي على بقعاء من التكس للباص=وأيام رجليّه على ذا البصيصه
ترمي بهم بقعاء من الشرق لا عاص=وأيام تحداهم يمرّوا البصيصه
أحدن يجيه الرزق متراص ترياص=أبوص وأرباحه تجي درفصيصه
واحدن من الله لا زرع نخلها شاص=ماتثمر النخله ولو كان شيصه
ياحظي اللي غامزنك بمشراص=وش فيك تمشي فالدروب الغميصه
وانا من أهل الصدق مانا بغماص=أمشي على ماقد مشى بو خميصه
خليتني مثل الذي صار منداص=شفت الدروب المستوية رعيصه
يوم إن غيري عازته بالتبلاص=وإذا انقضت له واضحٍ دربصيصه
أنا على وضح النقا فوق درواص=أجيب مطلوبي ولو كان صيصه
من شان عازاتي مع الوقت محياص=اجيبها لو جاتني خربصيصه
من دهاء دعيميص خذت التدعماص=أسري والأبرص فالسماء له بريصه
أضمى وتروي لي ضماي أم علهاص=ومن دون مطلوبي أبيت النكيصه
متنصدٍ كوكب من الشرق لماص=وأرقب رياح تهب فيها تريصه
وأقول هبي من على أرض الابلاص=هبي عسى نظفر بذات العقيصه
هبي عسى نسلى بلى كل شياص=اللي نهص ناسٍ تعاف النهيصه
هبي عسى يرجع زمن سعد وقاص=ونعيش في عزة ونرمي الخميصه
هبي عسى ننسى وجع كل مقراص=وتبرا البثور اللي تركها قريصه
ويصير للمحنوب فالضيق مفلاص=ويرتاح من حمع الهموم الرصيصه
هبي وسوقي فالسماء كل الأحراص=نبغا على الجدباء مطرها خصيصه
وندوج فالصحراء على ذات الأفصاص=ونشوف منبات الزهر والجميصه
ونبات في راحه بعد حال منغاص=كنه برص راعيه يشكي بريصه
نبغا زمن يحكم على الأمس ب قصاص=الأمس عذبنا ونبغا قصيصه
من أمسنا ف جلودنا آثار هراص=ولليوم عاد احنا نعاني هريصه
من أمسنا ف حلوقنا آثار فغاص=ولليوم عاد احنا نعاني فغيصه
ياالله عسى باكر عن الأمس معكاص=باكر يجي مافيه بيصه وحيصه
يشرق علينا بالمسرات بصّاص=نتقاسم أفراحه سوى بالنصيصه
بأرباعه أرباعه وبأنصاصه أنصاص=مافيه لازودٍ ولا به نقيصه
مافيه من أمس التعنفص تعنفاص=اللي لنا در الحلايب شنيصه
عشنا معه غصباوهو كان علفاص=يامر وينهانا وشفنا هصيصه
حتى الصغير اللي من الثدي مصاص=كنه موقت له ل ساعة عصيصه
يمشي وراه ومشيته مثل عرفاص=إلين مايكبر ويطعم قريصه
لكن طلبنا من خلقنا بدهماص=يهب لنا الريضان بعد الحميصه
هو منزلٍ عم وطه والإخلاص=واحنا له نصلي فروضه حريصه
وياهاجسي شكرا على قافية آص=كفيّت في آصه ووفيّت إيصه

شرح معاني بعض المفردات

بصباص:البعير الضخم بلغليصه :جوف الركبه الأحفاص:الأسود
أباحنبصيصه:الثعلب بلهاص:عدى من الفزع بيصه:شده أبواص:غنم حنفصيصه:صغير الجسم
بهاص:مناع جنيصه:ميّته جرجاص:الرجل الشديد حكيصه:ريبه الأحماص:صيدالظباء نصف النهار
دغاص=غياض شكيصه=سيئ الخلق آص:الشحم أميصه:طعام من لحم العجل بجلده أصيصه:البيوت المتقاربه
رميصه:تجبيره وقت شصاص:سنين جدباء البهيصه:المنع والحرمان ,العطش ساق عرقاص:نبات عظيم النفع
رهيصه:وقزة تصيب بطن الحافر شنقاص:جندي الاصيصه:الجره إرهاص:بتعمد وترصد
علماص:مايتعجب منه المرء ارتعص:تلوى انداص :سال دلاص:البريق دليصه:ملوسه وليونه
دنكنيصه: نهر في الهند خويصه:زينه حربصيصه:الحليّ دلماص:الراس الاصلع
الادعاص:الكثبان الاعراص:الساحات بين البيوت دعاص:قتّال البصيصه:منازل الجن ,الارض
عاص: وادي بين الحرمين شبيصه :تداخل شوك الجر في بعضه مشقاص:نصل عريض أو سهم
شميصه مليصه:انفلاته وانملاسه معراص:هلال صعفاص :حكي اليمامه
الإجاص:الكمثرى والمشمش حفيصه:عجم النبق(الدوم) دربصيصه:السكوت خوفا
أبو خميصه:الصحابي(معبد بن عباد) درواص:الناقه السريعه صيصه:قرن الظبي
دعيميص:رجل أسود دخل صحراء وبار منداص:متفاجئ بالشر دلمصيصه :قطعة ذهب
دخراص:تبيين الأمر بصيصه:بريقه ارعاص:نفض وهز وجذب خميصه:ضامرة البطن
الأبرص:القمر جصيص:تأوه الرجل في الرباط متراص ترياص :فرس صفاته مستويه عدله
الأحراص:السحاب المقشر لوجه الارض مطرها الأخماص :الجراح البعيصه: الإطراب ونحافه البدن
دهماص:إحكام نخلها شاص:لا يلقح شيصه:تمر لا يشتد نواه مشراص:حديد مثني تغمز بها الدابه
عرفاص: الصوط يوم عماص:يوم حامض غماص:كذاب غنص:ضيق الصدر


وسلامتكم

اخي بليق صح لسانك على هذه الرائعة والمعلقة الجميلة التي اخزلتها لنا وفضفضت بها قريحتك الشعرية الجزلة ولك الاحترام على ما قمت بة من شرح المفرادات التي انرت بها بل ووضحت المعاني التي

لم نكن نعرف بعضها الا الان منك تحياتي لك وفعلا مكسب كبير ان يكون من ابناء المصعبين وبهذه الثقافة الكبيرة شخص مثلك تقبل تحياتي وصح لسانك ..

اخي الغالي بليق لقد ابدعت في هذه القصيدة الصادية
روعة وجمال واتقان وابداع بلا حدود
نتمنى لك التوفيق وصح لسانك
لك مني الشكر والتقدير

ابدعت ايها البليق في القصيده الرائعه
شكرا لك ايها الرائع

سلام عليكم ورحمة الله وبركاته

والعين سهرانـه وذا القلـب منهـاص ماطـاع يهدالـي وضاقـن فريصـه


ضاقن من أيامٍ خسيسـات ورخـاص فيهـا وليـد أمـه نجومـه لميـصـه


في شرعها تعشق ردييـن الأشخـاص اللـي يحبـون الـردى والرخيصـه


وتعانـد اللـي للجمـالات قـنـاص اللي لفعـل الطيـب نفسـه ربيصـه


اللي على جـرّة الأجاويـد قصـاص قابـض بأثاريهـم ولا شـي يحيصـه


تطلق عليه النار بسهـوم ورصـاص ودرعه مـن الايـام واجـد لويصـه


تعصر لـه العلقـم وتسقيـه بقـلاص ويغص في حلقـه ويمغـط غصيصـه


صابر عليها صبر من فالبحر غـاص في بطن حوت وماياس مـن فليصـه


يرجي فرج منجي نبيّـه بإخصـاص يوم المره من خلـف قـدّت قميصـه


يالله تفرجهـا بعـد طـول مخبـاص مخباصهـا يالله كرهـنـا خبيـصـه


سرحانها يعـوي ويلـوي بالأقفـاص والحـر الأشقـر عقبـوه القنيـصـه


والثعل من بعده بطـل كـل مرقـاص والبوم فـي عالـي سمانـا حويصـه


ايـام مايجلـى غثاهـا بـالأقـراص اللي مـن الدكتـور معهـا بوليصـه

صح لسانك اخوي وبيض الله وجهك
قمه قمه في الابداع وروعه شاعر متمكن
ومن الدرجه الاولى الي يقدرعلى هذه القافيه
لك كل اشكر والتقدير
اخوك القويم المحزم

صح لسانك وكفاك شر الدنيا

ابداع x ابداع x ابداع

وكفى

صراحة في قمة الروعة
مشششششششششششكككككككككووووور