هاجسي جب لي....................محمد صالح الدفيعه

هاجسي جب لي من أبياتك اللي تستطيع=هات منها ماتشاء هات مافيها اقتراع
دام قلبي من عيا الوقت وجروحه وجيع=والمتاع اللي معي صار مايصلح متاع
هات باأغني بصوتي من الشعر البديع=مايسّلي القلب من هم ورّده الضياع
لين يرمي بالهموم غبّة البحر الوسيع=رمية ٍ ماقبلها الا نودعها وداع
وش حياة الآدمي لا قضى عمره سريع=ولاح شيبه ماشرى في مناويّة وياع
أشهد أنه عيش راعيه به حظه شنيع=حابسه فالضيق وفجوج ذا الدنيا وساع
لأجل ذا ياهاجس اقطف نواوير الربيع=خص منها اللي شذاها يفوح من اليراع
والله إني ماتهاون ولا أرضى بالوضيع=الوضاعه لأهلها والرفاعه للرفاع
يالله إني طالبك وأنت ياربي سميع=سهل أمري وين ماجيت وأنت اللي مطاع
سد مأرب طاح رغم إنه السد المنيع=هدّه الفار الصغير رغم قوة الامتناع
حافت الدنيا ولافت وياكمن صريع=ماتوقع تصرعه بعد ذاك الارتفاع
كم ملك بالأمس يأمر وشعبه له مطيع=والصباح أصبح وسط سجن ماعنده دفاع
وكم ملك هامل وكمن ملك حكمه نزيع=وكم ملك ضاقت به الأرض رغم الاتساع
يوم ربي قالها قالوا العالم ربيع=خاف لا جاء الصيف نقلي القعايد والفراع
مادامت الدنيا لأحد لو تقر وله تطيع=بعد سكرّها يذوق الحدج حتى النخاع
غير ياسرحان ذي للنصيحه تستميع=و الذكاء ويا الدهاء فيك من زين الطباع
يافتى لا ضامك الوقت من عادك وديع=لازم إن تصبح على وجه ذالدنيا شجاع
يافتى لا ذقت طعم الدلع بكره يضيع=تنهزم لاصرت وحدك وقدامك سباع
اقنص الصيده متى لاح قدامك قطيع=لو تخليها خذتها الوحوش اللي جياع