قصيدة الوقداني العتيبي

اوسمتي · 05-08-2011, 07:13 PM

أيامنـا والليالـي .. كـم نعاتبـهـا

شبنا وشابت وعفنا بعض الأحوالـي

أيـام فـي غلبهـا وأيـام نغلبـهـا

وأيـام فيهـا سـوا والدهـر ميالـي

تاعـد مواعيـد والجاهـل مكذبـهـا

واللي عرف حدها من همهـا سالـي

إن أقبلت يوم مـا تصفـي مشاربهـا

تقفي وتقبل وما دامت علـى حالـي

فـي كـل يـوم تورينـا عجايبـهـا

واليوم الأول تراه أحسن من التالـي

جربت الأيـام ومثلـي مـن يجربهـا

تجريب عاقـل وذاق المـر والحالـي

يضحك مع الناس والدنيـا يلاعبهـا

يمشي مع الفي طوع حيث مـا مالـي

كم مـن علـوم وكـم آداب نكسبهـا

والشعـر مـازون مثقـال بمثقالـي

أعرف حروف الهجا بالرمز وأكتبهـا

عاقل ومجنون حاوي كـل الأشكالـي

لكـن حظـي ردي والـروح متعبهـا

مافادني حسن تأديبـي مـع أمثالـي

إن جيت أبي حاجة عـزت مطالبهـا

والعفو ماواحد فـي النـاس ياوالـي

قـوم ليـا جيتهـا رفـت شواربهـا

بالضحك وقلوبها فيها الـردى كالـي

وقوم ليـا جيتهـا صكـت حواجبهـا

وأبدت لي البعض في مقفاي وإقبالـي

ماكنـي إلا مسـوي حـال مغضبهـا

والكل فـي عشرتـه ماكـر ودجالـي

ياحيف تخفى أمـور كنـت حاسبهـا

واللي على بالهـم كلـه علـى بالـي

الجـار جافـي وكـم قـوم محاربهـا

والأهل وأصحابنا والـدون والعالـي

والروح ويش عذرها في ترك واجبها

راح الحسب والنسب في كثر الأموالي

نفسي تبا العز والحاجـات تغضبهـا

ترمي بهـا بيـن أجاويـد وأنذالـي

المـال يحـي رجـال لا حيـاة ابهـا

كالسيل يحي الهشيم الدمـدم البالـي

عفت المنازل وروحي يـوم أجنبهـا

منها غنيمة وعنهـا البعـد أولالـي

لاخير في ديرة يشقى العزيـز ابهـا

يمشي مع الناس فـي هـم وإذلالـي

دار بهـا الخـوف دوم مايغايبـهـا

والجوع فيها ومعها بعض الأحوالـي

جوعى سراحينهـا شبعـى ثعالبهـا

الكلـب والهـر يقـدم كـل ريبالـي

عز الفتى راس مالـه مـع مكاسبهـا

يامرتضي الهـون لا عـز ولا مالـي

دللت بالروح لين أرخصـت جانبهـا

وأنا عتيبي عريـب الجـد والخالـي

قوم تدوس الأفاعـي مـع عقاربهـا

والها عزايـم تهـد الشامـخ العالـي

خـل المنـازل وقـل للبيـن يندبهـا

يبكي عليهـا بدمـع العيـن هطالـي

لا تعمـر الـدار والقـالات تخربهـا

بيع الردي بالخسارة واشتـر الغالـي

ماضاقت الأرض وانسـدت مذاهبهـا

فيهـا السعـة والمراجـل والتفتالـي

دار بــدار وجـيـران نقـاربـهـا

وأرض بـأرض وأطـلال بأطـلالـي

والناس أجانيب لين انـك تصاحبهـا

تكون منهـم كمـا قالـوا بالأمثالـي

الأرض لله نمشـي فــي مناكبـهـا

والله قـدر لـنـا أرزاق وأجـالـي

حـث المطايـا وشرقهـا وغربـهـا

وأقطع بهـا كـل فـج دارس خالـي

واطعن نحور الفيافـي فـي ترايبهـا

وابعد عن الهم تمسي خالـي البالـي

من فـوق عمليـة تقطـع براكبهـا

فدافـد البيـد درهــام وزرفـالـي

تبعدك عـن دار قـوم ودار تقربهـا

واختـر لنفسـك للمنـزال منزالـي

لومـت فـي ديـرة قفـرا جوانبهـا

فيها لوطي السباع الغبـس مدهالـي

أخير مـن ديـرة يجفـاك صاحبهـا

كـم ذا الجفـا والتجافـي والتعلالـي

دوس المخاطر ولا تخشـى عواقبهـا

الموت واحـد وبعـد العـز يجلالـي

إن المنـايـا إذا مــدت مخالبـهـا

تدركك لو كنت في جو السما العالـي

ماقرت الأسـد فـي عالـي مراقبهـا

تسعى على الرزق ماحنت في الأشبالي

والشمس في برجها والغيـم يحجبهـا

تقفي وتقبل لها في العـرش مجدالـي

رب السمـوات يامحصـي كواكبهـا

يامجري السفن في لجـات الأهوالـي

ضاقت بنا الأرض واشتبت شبايبهـا

والغيث محبـوس يامعبـود ياوالـي

يالله مـن مزنـة هـبـت هبايبـهـا

رعادها بات اله في البحـر زلزالـي

ريح العوالي مـن المنشـا تجاذبهـا

جذب الدلي من جبا مطويـة الجالـي

ديمومـة سبلـت وأرخـت ذوايبهـا

وأنهل منهـا غزيـر الوبـل همالـي

تسقي دياراً شديـد الوقـت حاربهـا

ماعاد فيها لبعـض النـاس منزالـي

ياجاهـل اسمـع تماثيـل مرتبـهـا

فيها معانـي جميـع القيـل والقالـي

مثل المحابيـب زادت فـي قوالبهـا

في صرفها زايدة عن قرش وريالـي

يـارب توبـه وروحـي لا تعذبـهـا

يوم القيامـة اذا ماضاقـت أعمالـي

وأزكى صلاة على المختـار نوهبهـا

شفيعنا يـوم حشـر فيـه الأهوالـي

وسلامتكم......

اوسمتي · 06-08-2011, 01:23 AM

قصيده جميله ورايعه كروعتك

استمر بالطرح والتالق هذا

لقد قنصت لنا قصيده جزله تحمل بين طياتها الكثير والكثير

تحياتي

اوسمتي · 06-08-2011, 04:02 AM

اقتباس:

المشاركة الأصلية كتبت بواسطة بن فلاح المصعبي

قصيده جميله ورايعه كروعتك

استمر بالطرح والتالق هذا

لقد قنصت لنا قصيده جزله تحمل بين طياتها الكثير والكثير

تحياتي

هذا يدل على ذوقك الرفيع وإن شاء الله ابحث عن الجديد تسلم اخويه( بن فلاح المصعبي)

اوسمتي · 09-08-2011, 11:38 PM

اوسمتي · 11-08-2011, 05:41 AM

اوسمتي · 11-08-2011, 11:46 PM