(( المــــرجــلــه قول وفعل ماهي بـ لحى واشنــابي ))

السلام عليكم

اسمحولي اقدم ثالث قصايدي لكم وإن شاء الله تعجبكم

الطير مايرقى سدى وتحت اجنحه مخلابي
والمجد ماهو من كبر يحمل صفات عزومه
وللقاب تتوزع سدى وماكل هدف ينصابي
والعزم يطلبني جهر اعطي خيار علومه
ولفعال لوماناطحت قرن السما تنعابي
ولمجاد تتسجل فخر طول الدهر مرقومه
وان كان فعلك يافتى شامخ على مرقابي
فبشر بعزك يافتى جاك الفخر بختومه
وان كنت شاطر بالكلام ومنهجك كذابي
فالكذب ماوصل بعيد وشيمتك مذمومه
الذيب لامنه عوى يبرق بـ فمه نابي
ويصدح صدى صوته يرجرج هامته وحزومه
والمرجله قول وفعل ماهي بـ لحى واشنابي
ومن ماسعى للمرجله لايفتخر في قومه
لاتقول دامني انا من لابتي واقرابي
بفخر وهذا لي كفى وش للسعي ولزومه
ولاتقول انا جدي رقى ومن هامته يرقى بي
ياكيف تطلب رفعتك من روحه المرحومه
اسمع كلامي وافطنه دامك نصيته بابي
من عاش ذالدنيا حلم شف هامته مردومه
اركز خيامك وانفرد واغرس شديد اطنابي
وانظر مراقيب الفضا عللك بـ يوم تحومه