قصيده ورد بين الحبيني والبحيري

السلام عليكم

هذي مجاراة بين

الشاعر مشعل الحبيني

و

الشاعر حميد البحيري


===============

يقول منهـو حاربـت عينـه النـوم

رمت سهرهـا و الشقـى بالرقـادي

لوصرت مرتـاح ابيتـي و مخـدوم

والحـال ميسـوره و هـذا مـرادي

لاشك يطرينـي نشانيـش وحـزوم

ويطري مسيل الروض والعشب بادي

وفياض سدر(ن)شيح و فياض قيصوم

والرمث والعرفج وروض الجـدادي

يا كود ما نبعد و حنا بشهـر صـوم

مير الوعـد بـأول نهـار العيـادي

نركب على الجيبات و الحمل محزوم

ما فيهن السكـراب كلهـن جـدادي

شدو عليهـن راكبـه كـل شغمـوم

عجلين للمطـراش عقـب القعـادي

مع صحبة كلهـم مشاكيـل و قـروم

الكـل منـهـم لـلـوازم قـيـادي

واليا وصلنـا للحفـر باخـر اليـوم

نقضـى الحوايـج ناويـن البعـادي

يم خايع(ن) قفر(ن) نياشينه رجـوم

يجيـه منـدوب الولـع بإجتهـادي

ومعنا حرار(ن) ما يجي فيهن اللـوم

ارداهن اللي ما يقـل طيـر عـادي

وخرشا قصير الساق و البوز مقطوم

طرح الخلا مـا قرنسـت بالبـلادي

ومعنا حمر صافي ثنو حر صيـروم

طرح الكويت معـرض(ن) لنفـادي

و معنا شمالي لأبرق الريش لاطـوم

أفجح هجير عرضه عن الطول زادي

و طيري اللي لا رقى يدرج الحـوم

ما هـو ابيتيـن ضـرى للبـرادي

فرخ(ن) شليله اخر الريـش مثلـوم

ضار(ن) على الغران طير الهـدادي

أقطم وسيع العين و الفخـذ مبـروم

حرشه كفوفـه و الصوايـد حـدادي

جثل اللحم كنه من الريش محـرووم

عـدل المناكـب ناطيـات الثنـادي

ما يختلـف فيـه الصقاقيـر معلـوم

جنسه اصيل الطير طرح الحمـادي

ساموا و قمنا نفرق السـوم بالسـوم

يوم ان بعض النـاس زاد المـزادي

ويادار لو شمتي انا عنك مـا شـوم

و لزم الحضر ما هو بكره البـوادي

و اضن ان ابو حامد بعد مثلي اليـوم

حميـد البحيـري ضديـد المعـادي

يا حميد اخذ الوصف لا تامن انجـوم

اخذ الأحداثيـات و لا انـت بغـادي

و اختم سلامي عد ما بانـت انجـوم

علـى رسـول للمخاليـق هــادي

الشاعر/ مشعل حمود الحبيني






========الرد=======

يقول منهو ابـدع القـاف منظـوم *

** اليا بدع قاف(ن) يقولون جـادي

يصوغ قاف(ن) في معانيـه مفهـوم

يطرب لـه سامـع ومـن استفـادي

بامر الذي سامع دعـا كـل مظلـوم

الواحد اللـي عالـم(ن) بالإعبـادي

لاباس ياللي حاربـت عينـه النـوم

سهـران ليلـه ليـن زال السـوادي

قاف(ن) وصلني في معانيـه ملمـوم

عـلا بيوتـه بالجزايـر وشــادي

من شاعر(ن) عندي عزيز ومحشـوم

من مشعل اللـي بالشدايـد اسنـادي

يا ابن الحبيني يا ذرا كـل مضيـوم

صيتك مع نجواك طيـب(ن) وكـادي

بينت لي ما كـان بالجـاش مكتـوم

منـه عيونـك مهتنـاة بالـرقـادي

وهيضت قلب(ن) ضايق البال مهموم

دامت هجوسه فـي ضميـره تنـادي

يبغى الفياض اللي بها العشب كي يهوم

غيثه مـن اول جيـة الوسـم بـادي

واضفا خضاره في اراضيه موسـوم

يا عل قاعـه مـا يجيـه الجـرادي

مع خوه اللي طيب الساس واعـزوم

دين وعقـل والـراي دايـم سـدادي

شرواك عارف طبع الأجواد باسلـوم

شغمـوم مـا تلقـى عليـه انتقـادي

وكل(ن) كلامـه بالتماثيـل محكـوم

ارجال تمشي فـي دروب الرشـادي

ويا ماحلا عقب العشا جمعـه قـروم

وفنجال بن(ن) بـه جديـد القنـادي

سوالف(ن) والقول بالصيـد محسـوم

والصبح بامر اللي عليـه اعتمـادي

نقنص بقاع الصيد والـرزق مقسـوم

بأرض تـداوي خاطـري والفـؤادي

ومعنا مثـل عـزام والطيـر لاهـوم

كل(ن) مجرب بـارع(ن) بالهـدادي

وطيري اللـي بالتواصيـف معـدوم

ابيض نحر شامي عطيـب الأيـادي

لكن ضاربه بأبرق الريـش مسمـوم

في صايد(ن) حـده سـواة الهـوادي

صايد ودايم بأبـرق الريـش ملحـوم

مضرب كفوفه مـا وراهـا ضمـادي

ونسمع كثير الهرج بالطيـر واللـوم

يا زين قولة ابشـر الفـرخ صـادي

صيد وطـرب باجـر تمنـاه بحلـوم

عمر البشر نار(ن) وراهـا رمـادي

وصلوا على اللي بالرسالات مختـوم

عد البشـر واعـدا مـا سـال وادي

الشاعر/ حميد مسلم البحيري

منقول