ايامناء والليالي كم نعاتبهاء***** شبنا وشابت وعفنا بعض الاحوالي
توعد مواعيد والجاهل مكذبهاء**** واللي عرف حدها من همها سالي
ان اقبلت يوم ماتصفي مشاربها ***** تقفي وتقبل ومادامت على حالي
في كل يوم تورينا عـــــجايبها ***** واليوم الاول تراه احسن من التالي
ايام في غلبها وايام نغلبــــــهاء ***** وايام فيهاء سواء والدهر ميالي
جربت الايام مثلي من يجربـــها****** تجريب عاقل وذاق المر والحالي
نضحك مع الناس والدنياء نلاعبها*** نمشي مع الفي طوعا حيث مامالي
كم من علوم وكم اداب نكســـبها ***** والشعر مازون مثقال بمثقالي
اعرف حروف الهجاء بالرمز واكتبها *** عاقل ومجنون حاوي كل الاشكالي
لكن حــظي ردي والــروح متعبها ***** مافادني حسن تأديبي مع امثالي
ان جيت ابي حاجة عزت مطالبها ***** العفو ماواحد في الناس ياوالي
قــوم ليا جيتها رفــت شواربها ****** بالضحك واقلوبها فيها الردى كالي
وقوم ليا جيتها صكت حواجبها ****** وابدت لي البغض في مقفاي واقبالي
ماكني الاعـلى حال ومغضبهـا ****** والكل في عشرته مـاكر ودجالي
ياحيف تخفي امورا كنت حاسبها ****** واللي على بالهم كله على بالي
الجار جافى وكم قوما محاربها ***** والاهل واصحابنا والدون والعالي
والروح وش عذرها في ترك واجبها **** راح الحسب والنسب في الاموالي
نفسي تبي العز والحاجات تغصبها ***** ترمي بها بين اجــاويد وانــذالي
المال يحيي رجـــــالا لاحياة بــــها ****** كالسيل يحيي الهشيم الدمم البالي
عفت المنازل وروحي يــوم اجنبها ***** منها غنيمه وعنها البعد اولالي
لاخير في ديرة يشقى العزيز بـــها ****** يمشي مع الناس في هم واذلالي
دار بها الخوف دوم ما يغايبـــها ****** والجوع فيها ومعها بعض الاحوالي
جوعى سراحينها شبـــعى ثعالبها ******* ال*** والهر يقـــدم كل ريبالي
عــز الـفتى راس ماله من مكاسبها ******* يامرتضي الهون لاعزا ولامالي
دللت بالروح لين ارخصت جانبها ******* وانا عتيبي عريب الجد والخالي
قوم تدوس الافاعي مع عقاربها ****** ولها عزايم تهد الشامخ العالي
خل المنازل وقــل للبين يندبــها ******* يبكي عليها بدمع العين هطالي
لاتعمر الـدار والقــالات تخربها ****** بيع الردي بالخساره واشتر الغالي
ماضاقت الارض وانسدت مذاهبها ***** فيها السعه والمراجل والتفتالي
دار بدارا وجيرانـــــا نقاربــــــها ***** وارضا بأرضا واطلالا بأطلالي
والناس اجانيب لين انك تصاحبها ****** تكون منهم كما قالوا بالامثالي
الارض لله نمشي في مناكبــــــها ****** والله قدر لنا ارزاقا وآجالي
حــث المطــايا وشرقها وغربهـا ****** واقطع بها كل فجا دارسا خالي
واطعن نحور الفيافي في ترايبها ****** وابعد عن الهم تمسي خالي البالي
لــو مـت في ديرة قفره جـوانبها ******* فيها لوطي السباع الغبس مدهالي
اخير من ديرة يجفاك صــــاحبها ****** كم ذا الجفا والتجافي والتعلالي
دوس المخاطر ولاتخشى عواقبها ****** الموت واحد وبعد العز يجلا لي
ان المنايا اذا مـــــدت مخـــالبها ****** تدركك لوكنت في جو السماء العالي
ماقرت الاسد في عالي مراقبها ******* تسعى على الرزق ماحنت للاشبالي
والشمس في برجها والغيم يحجبها ***** تقفي وتقبل لها في العرش مجدالي
رب السماوات يامحصي كواكبها ****** يامجري السفن في لجات الاهوالي
ضاقت بنا الارض واشتبت شبايبها ***** والغيـث محبوس يامعبود ياوالي
يالله من مــــــزنة هــبت هبايبـــها ****** رعادها بات له في البحر زلزالي
ريح العوالي من المنشاء تجاذبها ******* جذب الدلي من جبا مطوية الجالي
ديمومة سبلت وارخــت ذوايبــها ******* وانهل منها غزير الوبل همالي
تسقي ديار شديد الوقت حاربـــــها ****** ماعاد فيها لبعض الناس منزالي
ياجــــاهل اسمع تماثيلا مرتبـــها ******* فيها معاني جميع القيل والقالي
مثل المحابيب زادت في قوالبــها ******* في صرفها زايده عن قرش واريالي
يارب توبه وروحــــي لاتعــذبـها ******* يوم القيامه اذا ماضاقت على حالي
وازكى صلاتي على المختار نوهبها ***** شفيعنا يوم حشر فيه الاهوالي