يا الله على مرعى البداوه بلمطار=هلي عليهم ياسحب بالمطاره
انا منهم بدوي ولي معهم اسرار=قلبي مسي دار البوادي شعاره
وش صار يابو تركي اليوم وش صار=البدو شدوا والمنازل قفاره
سارت جميع البدو واتغير الدار=يارب رجع كل واحد لداره
اهل الخيم شدوا ولاجاتنا اخبار=حنا من البعدا تركنا الزياره
شدوا وفي اولهم رشيقات لعمار=يابخت مرعى يسكنوا في جواره
ماعاد شفناهم ولا انقصت اثار=بعد الوضيحيات منا خساره
لا الزين وادعنا ولا قدم اعذار =وش غيرة وابعد علينا مزاره
ويش اصله لا ديرة القوم لشرار=هل ذا برغبة خاطره واختياره
لما طرح دونه لنا شبك واسوار=قطع علاقاته بنا والسفاره
ياريح ذي لعبتي اغصان لشجار=ردي لهم تسليمنا بالاشاره
قولي لذي في اعيانها سحر واخطار=ماحد يدور للصديق الدحاره
معنا لهم في القلب صوره وتذكار=وعاد كلن صاحبه في انتظاره
عسى بطارش خير يدي لنا اخبار=من قال عادوا بايشل البشاره

وش ريت يا نجم ساري في السماء وش ريت=يانجم ريتك تخبرني بما ريته
يوم انت تنظر في ارض الله متى سريت=كلن ونورك يزوره لاوسط بيته
ابعث بنورك رساله كلما سريت=لذاك ذي من صميم القلب حبيته
بديك سري وخبرهم بما عانيت=اما لغيرك كتمت السر ما اديته
لو بنظر الخل مثلك نظره استكفيت=يكفي متى قلبي اطمن بعافيته
قله على عهدي إن أصبحت ولا أمسيت=وقل صديقك بطول الغيبه اظنيته
حتى من الماء شفه صابر على ما أديت=شربه من العام لول يوم لاقيته
والشربة الثانية في نومي اتساديت=كاس الهواء في يده اليمنى وجريته
واتجدد الحزن عندي وقت ماهديت=والليل مسبل وكلن نيم في بيته
والطير نادى محبينه ونا ونيت=وقلت ياطير هل لك خل ظميته
اسهرت عيني بصوتك عندما غنيت=انته تغني وعاشق صدق بكيته
يكفي من الهجرعه ياطير لاشبيت=ولا فعشك متى لا الصبح طزيته