كلٍ يعوّد لاصـل جـدّه ومربـاه=راعي الشرف يشرف والانذال يهبون
الفْرع من عـوده شرابـه ومسقـاه=والحنظلة مرّه ولو تشـرب مـزون
الطّيـب كايـد والمناعيـر تـقـواه=والهون هيّن تدنـع النفـس وتهـون
ناسٍ على كسب المراجـل مضـرّاه=وناسٍ على كسب الفشيلة يضـرّون
هذا على وضح النقـا كـل ممشـاه=وهذا ليـا شافـوه ربعـه يصـدون
لا تامن الخوّان لو زخـرف حكـاه=من خان بك مرّه يبي باكـر يخـون
وافطن ترى زول الرّجاجيـل تـوّاه=كم واحدٍ يعجبك زولـه وهـو دون
يا طيّب الشارات مـن يـوم منشـاه=احذر عدوّك لايغدرك علـى هـون
ترى عـدوك غايتـه فيـك ومنـاه=يزرع بصدرك من قنا رمحه طعون
والّلي رضع لبـوة عـدوّك توقّـاه=الجرو ولـد اللبـوة الّلـي تعرفـون
للطّير يالصقّـار بالرّيـش مغـواه=الجاهل الّلي باكثر الريـش مفتـون
للحُـر والشبـوط ماكـر ومجنـاه=والفرق بالافعال لو هُـم يطيـرون