يا غافر الذنب يا لله يا كبير اكبر=عساك تغفر ذنوبي يا عظيم الشان
وقال بن لزنم الهاجس معي حضر=جاني في الليل سهر طرفي النعسان
ومسيت انا وياه لتشاور ولتخابر=اخبارنا في السنين الماضيه والان
وكل ما جيت با رقد طول المسمر=سهران لما غبش ما غمضت لعيان
ومسيت فكر هموم الوقت واتذكر=الوقت ذي تعب الشيبه مع الشبان
زمان نكد على الغايب وعالحاضر=لاسامح الوقت ذي نكد على الانسان
ذي رجع الطفل شيبه والكبير اصغر=والعايب القاه وافي والوفي غلطان
والكذب مسموح له والصدق مايذكر=واهل الحيل يرفعوهم والكريم اهتان
ومن سنه لا سنه والوضع يتدهور=وصحابنا حد عمد صنعا وحد نجران
وين الرجاجيل ذي كنا بهم نفخر=دي كان تاريخهم معروف في لوطان
تاريخهم قد كتب في الريف والبندر=من شبوه اول اشاره فجرت بركان
غلطان يا ذي تبا تاريخنا ينكر=تباه في سله الاهمال والنسيان
تاريخنا قد تسجل وافتح الدفتر=حطيب والكور بيشهد على ذي كان
زمان ثاروا على خاين ومستعمر=وصاحت انجلترا من هدت الرميان
في الكور ال بوبكر دخانهم غتر=هدات في الشمخ العاليه والوديان
هداتهم مثل رعد الصيف لاثور=في الكور والحيد لسود رعدها حنان
وصحابهم معن ما حد منهم قصر=حيشا على الجيد ما يجي منه القصران
والسيد الجفري اتكلم من المنبر=واهل الجنوب استجابوا حضر والبدوان
وفي حطيب الربيزي بن علي معور=ذي في بلاد العوالق اعلن العصيان
قاوم وقاومو معه خوته بني محجر=وكم م**** عنيفه كل شي قد بان
ذي قال ما لقبل النصراني الكافر=ثلاث تعشر سنه تصميمهم ما لان
وكل ليلة تقع هده على العسكر=وفي سعاده زجم رعده وفي محدان
والعام في خوره امسى طعن يا خنجر=ثاروا على عسكر الدولة بني ديان
واصحاب مرخة بقيت ارضهم محجر=ولا دخلها بريطاني ولا سلطان
والحارثي والمصاعب علمهم يذكر=ثاروا وكانت لهم هدات في بيحان
وفي غنيه وفي ناطع وفي الميزر=وفي عسيلان والعليا وفي ريدان
ومن خليفه ومن عرماء ومن حمير=ياذي تبوا تدفنوا تاريخنا دفان
با خرج الصدق لاتمدح ولا باغتر=كوا لذي يهرجوا بالجور والبهتان
ذي قالوا ان كل واحد منهم ثاير=وحد من اصحابهم قايد وحد اركان
والبعض لاوجه البندق ولا خشر=والقوة تالي بطل فارس من الفرسان
ياما بواطل تخلي القلب يتفجر=وكل مخلوق يمسي منها ضجران
وين الجمال المنيبه كل هيج اسمر=ذي ما تهم الثقل لاحملوها اطنان
ان عاد شي با يظلي راعده يزجر=وله مثوره وله بارق وله رشان
ولاشفونا حنبنا كل يوم اكثر=يا غارت الله لا لصبح كما العميان
والختم صلي على المختار ما كبر=المصطفى الهاشمي المنسوب الى عدنان