بدع الشاعر صالح البيحاني ::



عاتي كما موج البحر والمحيطات = وعالي كما أبراج النجوم السهارا
وغالي كما الأرواح وأكثر مسافات = وانا مثل خلانك .. عليك إنتبارا
ويابومحمد ياصديق المسرات = كنيت لك في القلب كل اعتبارا
عميد الأدب شاعر كتبت المقالات = ورسمت للشعار أحسن مسارا
رايد جزيرتنا ونجم الإذاعات = حتى فحول الشعر أمامك توارا
زادت محافلنا بشعرك عبارات= تروي ضمأ العطشان نصف النهارا
تهتف بذكرك (إم بي سي) والمحطات = وكل المحافل حطتك مستشارا
شعرك مشاعر .. في جميع المقامات = خليت كل الناس تمشي حيارا
رفعت الأدب والشعر أعلى مسارات =ولولاك أدبنا ياعلي في إنهيارا
بشعرك بهرت أهل الوطن والإمارات = وصوت الجزيرة فيه كنت المنارا
تستاهل التبجيل في كل الأوقات = الله يزيدك ياصديقي إشتهارا
لانك سلالة من رجال الكرامات = رجال أصيلة تستحق الوقارا
وياليتني شاعر من أهل الكمالات = وامدح على مدح الملوك الكبارا
وأوضع على أكتافك جميع النشانات = واحط لك تمثال وابني شعارا
وافرض دواوينك مناهج دراسات = على العالم الغربي تدَرس جهارا


رد الشاعر علي بن محمد القحطاني ::



ياللي على شوفتك أزف البشارات = حييت ياشيخ الرجال الغيارا
مادارت أفلاك السما في المدارات = بين المشارق والمغارب مرارا
ياللي بعلمك تستفيد الحضارات = عِلم العرب سباق ..عِلم النصارا
ياللي تنقَل بين كل المطارات = مختار من كل الجهات إختيارا
يامعدن أصلي من رفيع العيارات = جابت جهودك طيبات الثمارا
من علمكم تتحقق الإزدهارات = تنبت جناين في قلوب الصحارا
عقول فذة تصنع الإنتصارات = حلوا على الكوكب بضغط الزرارا
كان اختيارك سيَد الإختيارات = جمع الكتب من كل مرجع ودارا
المال ماهو في طويل العمارات = المال علم(ن) نافع(ن) وإبتكارا
وانت الذي جبت الذهب والعقارات = ومديت واغنيت الرجال الفقارا
معروف ياللي ماتهم الخسارات= وانته سندنا كلما الوقت جارا
بالعلم يعطينا النجاح الإشارات = والمال طفرة عابرة وإنحدارا
والشعر لك فيه البيوت الغزيرات = غنا بها فوق الغصون الهزارا
لكن تجنبت العتب والإثارات= تبني بيوتك فوق صم الحجارا
وراك ياصالح قطعت الزيارات = وإحنا في الحي الشمالي جوارا !
في شارع(ن) رسمي على أربع مسارات = لازم تجينا من يمين او يسارا