الحب .. طفل ٍ سكن شعري وهوجاسي
وفي ظلوعي العـوج ربيتـه وكبّرتـه
خذاني من .. الوطن والناس وانعاسي
وابـلا قناعـه .. تقبّلتـه و بـرّرتـه
سلمت أمري إليه وطحـت متواسـي
إلين ماصار شـي ٍ مـا تصوّرتـه !!
حبيبتي .. كيف اكذّب حزني وياسـي
لو العذر يعـذرك قبلـك تعذّرتـه !!
الله يسامحك .. ما قدّرتـي احساسـي
وانا على شانك .. الاحسـاس قدّرتـه
نسّاني الهم .. غالـي ربعـي وناسـي
وذكرت ربي .. وقلبي فيـك ذكّرتـه
ودوّرتي اسهل طريق .. لضيقة انفاسي
ماكن درب الفرح .. لرضاك دوّرتـه
يـا سيّـدة خافقـي ومحطمّـة باسـي
كـم مـرة ٍ لمـت خفّاقـك وحذّرتـه
صحيح احبك .. وآخاف فراقك القاسي
وخطاك .. يامـا تجاهلتـه ومرّرتـه
لكنّـي اليـوم لا ذاكـر ولا نـاسـي
ودّعتك الله .. وقلبـي عنـك صبّرتـه
عساني الموت .. كان بينحني راسـي
ويا جعلي الضيم .. لو مبداي غيّرتـه
قصيدة الشاعر محمد جار الله السهلي