بسم الله الرحمن الرحيم
يا قابض راس المعزّة بعزة نفس
سلمك ربي من حسود وبلاسي
يا نادر بين الخلايق فريد الجنس
يا صقر نادر من سلالة بني ياسي
يا غارس ٍ أحلى وأغلى وأعلى غرس
غرس الحضارة ومجد ٍ ماله قياسي
دارك عروس زينوها بليلة عرس
لبستها استبرق وياقوت وألماسي
لقنتنا يابوخليفة علوم ودرس
علمتنا كيف الصخر يمسك الساسي
اسمك ياقايدنا يزين حروف الطرس
يا عود عز ٍ ترسخ في الوطن راسي
الحال ذا اليوم ماهو مثل حال الأمس
خضرت صحرا الوطن من بعد الاطعاسي
نورت مثل القمر في عتم ليل غرس
يانورنا بك نماري نور لاشماسي
غنّا لك الكاعب الاملد رهيف الحس
غض الصبا غرنجي والعود مياسي
يسلب وينهب إذا شل بعيونه النعس
وخشم ٍ سليل ٍ توّرد بين الأقواسي
والختم صلّوا عدد ماهب نود ونس
على النبي الهاشمي المبعوث للناسي
للشاعر : حميد بن سعيد النيادي
الله يرحمك يابوخليفة ويسكنك فسيح جناته .......