منتديات المصعبين - وين العدالة ...جديد الشاعر/محمد صالح الدفيعة المصعبي

قال الهواوي ياوليفي ليه حارمني المنام...أبات ساهر والجدى ماغير عداد النجوم

من يوم عيني شافتك الوضع صار انهزام..الجسم ناشف والسهر معلنن ضدي هجوم

ويـن العـدالة أنـت نايـم وأنا عكسـك تمام..أنت ماخـذ راحـتـك وأنا تعـذبـني الهـموم

وأنت الذي محتلني ناصب وسط قلبي خيام..ترعى بذودك داخلي حتى لو الرعي امعدوم

إن قلت مابه من نفل فيني ولا حتى خزام...والمطر غيًب سنين وجوي رياح وسموم

تـقول كيـفي راضية حتى لـو الدنـيا حطام...بـقـعد ولاني رايـحة حتى لـو الدنـيا تـقوم

أقــول كـيـفك لـكـن اللي تسـوي بي حرام.. تاخذ على كيفك وأنا من عطاياك امحروم

ويـن العـدالة بـعـدما وصلـتـني حد الهيام.. ترجـع تجافيـني ولا كـأن لـك فـيـني لـزوم

المـشكـلة لا جيت أبعلن على حبك عدام.. يطري علي اللي مع الوردة هديتك يالظلوم

تقفي أناظرة بيمينك واليسرا تلوح بالسلام..وشلون قلبك طاوعك تاخذ معك قلبي وتشوم

ماخبرت انسان عاش بقلبين في صدرة وئام...ولاخبرت انسان عاش بدون قلبه يالفهوم

مقفي تقول اني هواك مالك سواية من مرام..أنا الفارس اللي في منامك تصورني بالحلوم

وش عــاد أشـبـة حـالـتي وياك ياحـلو اللـثام..أنت البحـر بقفايتـك وأنت البحـر عند القدوم

لا صرت أنا شـاطـيـك يابحر المودة والغـرام..أرجــاك خـفـف ثـورتـك خــل مـوجـك رحوم

أنت البحر لامن هديـت تـسحر عقـول الأنـام..بلــونك بمنـظرك ونسايمـك والنورس يحوم

الآدمي لاضاق صدرة شاف زرقتك أستهام..تنعكس فيك السماء واللي عليها من غيوم

وداخـلـك ربـك خـلـق خـلـق و حـيـاة ونـظـام..وكنوز راعي الغيص مبطي لمكسبها يعوم

من فوق ظهرك للبـشر هم و المراكب علام..للسـفـر والصـيد والـحـرب لا حـان اللزوم

فـيـك الـمـزايـا تـعـدد مـا تـحـدد فـي كـلام..وعيبك تبدد هاجسي ردد ولا به من علوم

سوى الملوحة في مذاقك واندفاعك للأمام..لا صـرت ثـايـر ومـوجـك عـلى شطـك لطوم

شاطيك مابه من يزوره دام موجاتك عظام..يـعـني حـياتـي رهـن عـندك رجـيتك لا تشوم

وسلامتكم