يقول خو سالم يعين الله على الوقت المحين =فيه النكد والشين مابين القرابه كل حين
اخوان من لبوين تلحقهم طير متناكرين =لا جيت باتنصح رفيقك قال ذا خصمي يقين
وان جيت باتنهي المناكر ما تحصّل لك معين =قالوا فضولي يالله أكفى مننا المتعرضين
لا ما هنا بغضوك وامسوا من طريقك مجنبين =لا حل للدنيا تغمّر لك في اللون الحسين
وبعد تنفغ بك تخلي عظمك الصاحي طحين =الناس تبعوا شفها مرّه لها متخدمين
يتابعون الربح في الدنيا ولخرى خاسرين =يا قلب باحذرّك وانته للنصايح قع فطين
واضب على الاركان لي هي واجبه عالمسلمين =الاول التوحيد بالله و إحمد الهادي الامين
والثانية بلّغ فروضك لي هي الحصن الزبين =من لا يصليهن قضى عمره وهو وقته حزين
والثالثة زكوات مالك للمقل والسائلين =والرابعة رمضان صومه فرض بخت الصائمين
الخامسة لمن استطاع الحج سعوف الواقفين =من قام هذا تصلح اعماله في الدنيا ودين
يآمن ويستآمن و بايحفظه في الحفظ المكين =ومن تركها في سقر مأوى تقع للمذنبين
ذا فضل والهاجس زعلنا والخلايق راقدين =قايس نجوم الليل لما الشافعي ضوّه يبين
و دمع عيني مثل ماطر في رباء منشي سمين =لا هم من دنيا ولا بي ولف منسوع الجبين
ذلا ذكرت أجواد لي هم عالوفاء متعاملين =على الفضايل والمكارم والتقى متساعدين
وفي صلاح الناس واولات المنازل قائمين =لا يالله انفعنا بهم واسرارهم في الباقين
خذهم نذير الموت قدهم في جنان خالدين =أهن عليهم ون يالمهجوس واردف بالونين
اين اهلنا لي قد مضوا اين الجداد السابقين =هم روّحوا منها ونحن في تلاهم سارحين
اهل التلاوة والمدارس والعبادة راغبين =وقائمين بالليل لا نامت عيون الحاسدين
يالله يا رباه سالك تطلق العصب المكين =تغفر ذنوب العبد في ما قد جنى حمله رزين
يوم الفزع لكبر وكل شال خطّه باليمن =والعفو يالله لا تقع حسبه لنا واظهار خين
ونسكن الجنه ونحشر في سعوف الصالحين =والفي صلاة الله على المختار خير المرسلين
لي قام دين الله واستسلم رقاب المشركين=دمّر قرى الشامات لي ما صدقوه الجاحدين