أيا ورد لاموني وأنا أمجدك يا ورد =ومن لامني في الورد والله ما ألومه
لو إنه يشم الورد كان استحق الرد=ولكن روحه من شذا الورد محرومة
شذا الورد للي يعرف الورد برق ورعد=ولا فآتني عن طيٍب الورد معلومة
تعلمت منه إن الزمن فيه جزر ومد=ومن لم يصانع ربما ضاعت علومه
تعلمت منه إن الزمان ألردي له حد=ولا شفت غصن يطرح الورد من يومه
تعلمت منه ابعد عن الهزل يوم الجد=ولا أشبع وغيري يندب الدهر ويصومه
تعلمت كيف اصبر ليالي الشتاء عـ البرد=وأداري نهار القيض وأقاوم سمومه
ولا ارقي على عمود نخره الزمن وامتد=ولا اطلب لذيذ التمر من يابس الدومه
ولا اذكر الغالي بهمه نهار السعد=وإذا أمسى حزين شلت عن قلبه همومه
تعلمت كيف اجعل من الناس حولي سد=ولا أطيع نفسي واجعل خطاي مرسومه
ولو طعت نفسي اليوم بالومها في غد=ولآني بمعصوم ولاهي بمعصومة
تعلمت كيف اسهر وليه ومتى واعتدت =ولا أبات أناجي الليل واعدد نجومه
تعلمت ما اسرد على المسامع قصيدي سرد=ولا ابعد عن الفصحى ولا اجر مضمومة
ولاحظت كيف الورد وافي يصون العهد=ولا يجرح إلا من به صفات مذمومة
ولاحظت كيف الفرع يحمل صفات الجد=وكيف الورود بمصدر الشهد مختومة
وبعض الورود اللي بها أشواك تشفي الكبد =وبعض الورود اللي بلا أشواك مسمومة
ولا كل ما ياقف على الورد يصنع شهد=ولا كل من يرقى الجبل يعرف سلومه
ولا كل من يبني ولو تعب يبني مجد=ولا تستر اللي يهدم الشامخ هدومه
ولاحظت كيف إن الطري لا صبر يشتد=وقدر الفتى يبنى على قوة عزومه
ولاحظت كيف الضد يظهر جمال الضد =وللشوك منظومه وللورد منظومه
تعجبت كيف الورد ينمو وتحته لحد=وكيف الورود تعيش في السهل ورجومه
تفهمت ليه الطفل اذا شب ينسى المهد=وإذا شاب وحلم انه فتى صدق حلومه
تفهمت ليه الصقر يقدم ولا يرتد=وعللت ليه الليل يستر على البومه
ترى ألديره اللي تزرع الورد كف وزند=ترى الديرة الي تزرع الورد مرحومه
بكى الورد عطر ومن هشيمه بخوره=وكل يصف ورده على قدر مفهومه
وأنا ما اغرس إلا طيب الورد قبل وبعد=ولا اقرب من الورد المزيف ولا أسومه
وأنا في حما ورد ندي ما عرفت الوجد=ومن راح عني ما تحريت لقدومه
وأنا أسبح المولى واثني بشكر وحمد=جعل عبرتي في الورد وارضي بمقسومه
وباموت واحيا ما ازرع إلا غصون الورد=ومن يزرع الثوم الله يبارك بثومه

من أجمل ما قيل في الورد
تسلم يالغلا ع طـرحك الخطيير
تقبل طلتي