يانفسي الصبر الغنيمة ونا خوش=لابد ماربي يسهل فرجها
لاتشتكي والجاش بالضيق مجيوش=الا لرب النفس عالم خلجها
هو ما تشوفينه فلا حنّت البوش=دلهم سحايبها ورعده لججها
وانهل وسميها على قاعه طشوش=أحيا الهشيم ورحمها من لهجها
أقولها والكبد يانفسي تحوش=من لوعة أيامي وكثرة حججها
جربت أنا الأيام تجريب مدهوش=يرهش قفا الحالي وحصل حدجها
الأيام يانفسي لها شرع خردوش=قاصر ولاهو ينفهم في نهجها
تضيق في وجه الذي دايم يهوش=وينوش عدوانه ووقعه فلجها
كم ربطت بأمراضها عوله وحوش=نشوفهم مرضا ونعجز علجها
ماالاش قدهو لاش عظمانه هشوش=مابه زجا للعاليات ودرجها
مغشوش نوعه في الرجاجيل مغشوش=لاحد نتع كفه من ايده مرجها
أقولها يانفس والراس مدووش=والعين مرقدها بطا ما سهجها
من توقها لمشاهدة كل مدغوش=صامل هروجه بالمراجل هرجها
أمثال منهو يودع العظم معروش=وان جاع صوته تمتلي به فججها
هذاك هو والله له القلب مبشوش=لا سايرك ضوّك يزوّد وهجها
لاخلتك الأصحاب وأمسيت مبلوش=والهم مترابت ونفسك زعجها
يقبل كما ذودن على المارد عطوش=يترك لك الصافي ويشرب خمجها
وان شاف بك عذروب للناس مفتوش=غطاه والحسّاد فعله لطجها
راسه على الطالات يشتاط ويشوش=وخيله من البارح لخصمه سرجها
يجر سيفه من جفيره على جيوش=ماهو يجرّه للبرع في بهجها
عريب في مجناه وأخواله حموش=من طيبهم طيبه تزايد نتجها
هذاك له والله يبو طرف مريوش=قم ثنه القهوه وزوّد حوجها
لاما يقول الكيف ياحلو منعوش=مشكور منهو بهيلها قد مزجها
اللي صديقه يكسب الطول وينوش=وش له يفكّر في السنين وحرجها
يانفسي الصبر الغنيمه ونا خوش=والله يجيب أرزاقنا من برجها

وسلامتكم